Пуш уйăхĕн 7- мĕшĕнче, пĕтĕм тĕнчери Хĕрарăмсен кунĕ умĕн Сĕнтĕрвăрри районĕнче савăнăçлă «Чи, чи хĕр пĕрчи»  уяв-конкурсĕ пĕрремĕш  хут иртрĕ. Çак конкурса хапăл туса, йыхрава йышăнса Сĕнтĕрвăрри районĕнчи  тĕрлĕ ял хутлăхĕнчен чи чипер те сапай хĕр пĕрчисем Сĕнтĕрпуç культура Çуртне килсе çитрĕç.

 «Чи, чи хĕр пĕрчи» конкурса Сĕнтĕрпуç ял хутлăхĕн пуçлăхĕ В.В.Иванов,  Сĕнтĕрвăрри район администрацийĕн культура тата социаллă аталану пайĕн пуçлăхĕ Е.В. Матюшова,    Сĕнтĕрпуç пĕтĕмĕшле пĕлӳ паракан  шкулти вĕрентекен Вострова З.А. тӳресем хак пачĕç.

Виталий Валерьевич уяв-конкурсне салам сăмахĕсемпе уçрĕ. Вăл Сĕнтĕвăрри районĕн чăваш хĕр пĕрчийĕсене тата вĕсен ертÿçисене конкурса хутшằнма кằмằл тунишěн чунтан тав турĕ, ăнăçу сунчĕ.

Уяв-конкурс юмах тĕнчинчен пуçланчĕ. Хĕр пĕрчисем вăрмана çырла татма килсе çитрĕç. Çырла татнă вăхăтра Тухатмăш карчăкĕпе унăн тусĕсем Ула куракпа Шуйттан хĕр пĕрчисене çыхса лартрĕç, ăшаласа çиесипе хăратрĕç. Паттăр Иван килсе çитрĕ те, хăйĕн çивĕч хĕççипе хăмсарса: «Халĕ ĕлĕкхи мар вĕт, хĕр ачасене хăратса çӳреме, çĕнĕ ĕмĕрте сирĕн те çĕнĕлле пурăнмалла. Пурин те туслă пулмалла. Курăр-ха мĕнле илемлĕ хĕр пĕрчисем çитĕнеççĕ Сĕнтĕрвăрри районĕнче!»,- тесе хăтарчĕ  усалсене.

Сěнтěрпуç шкулěнче вĕренекенсем Аня Никоноровăпа Аня Демьянова çепĕç те илемлĕ, таса чăвашла калаçса ертсе пычĕç уява.  Çакăн çинчен каласа хăварма питĕ те  кăмăллă.

Чăваш хĕр перчийĕсем хăйсен пултарулăхне конкурс йĕркипе килĕшÿллĕн тăватă тĕрлĕ тупăшура палăртрĕç.Тупăшу xĕpÿ иртрĕ. Xÿxĕм те илĕртÿллĕ чăваш хĕр пĕрчийсем малтан хăйсемпе паллаштарчĕç. Иккĕмĕш конкурсра сăвă каласа тупăшрĕç, хăйсене тивĕçлĕн кăтартрĕç чиперккесем.   Виççĕмĕш конкурсра хĕр пĕрчисем хăйсен пултарулăхне юрăра, ташăра, юмах каласа панинче кăтартрĕç.  Чăваш халăх  тумне халăх умĕнче илемлĕн кăтартма пултарчĕç.

Сумлă тӳресем " Чи, чи хĕр пĕрчи" конкурса хутшăнакан вунпиллĕк хĕр пĕрчин ăсталăхĕпе пултарулăхне тĕрлĕ енлĕ хакларĕç. Çĕнтерÿçĕсене палăртнă чухне чăваш хĕр пĕрчийĕн чи паха енĕсене туллин кăтарма пĕлнине тата пултарнине шута илчĕç.

Хĕрÿллĕ тупăшура тÿресем баллсене шутласан "Чи, чи хĕр пĕрчи" ята Хуракасси ял хутлăхĕнчи Селимее Фадеева çĕнсе илчĕ.  "Куракансем кăмăллакан хĕр пĕрчи"   Сĕнтĕрпуç ял хутлăхĕнчи  Елизавета Иванова пулчĕ.  «Чи çивĕч ăç-тăнлă» ята Анастасия Федорова Сĕнтĕрпуç ял хутлăхĕ, "Чи хавхаланулăллă хĕр пĕрчи" ята Шуршăл ял хутлăхĕнчи Ульяна Альгеева,  «Чи вичкĕн хĕр пĕрчи» ята Аксарин  ял хутлăхĕнчи Валерия Калмыкова, «Чи хăюллă хĕр пĕрчи»  ята Урхас Кушкă ял тăрăхĕнчи Мария Никифорова, «Чи пултаруллă хĕр пĕрчи» ята Октябрски ял тăрăхĕнчи Анастасия Геронтьева, Сĕнтĕрпуç ял хутлăхĕн хĕр пĕрчийĕ Варвара Яичникова «Чи илĕртӳллĕ хĕр пĕрчи», Кукашни ял хутлăхĕн  хĕр пĕрчийĕ Алина Кузьмина «Чи тĕллевлĕ хĕр пĕрчи», Карапаш ял хутлăхĕн Аэлита Алексеева  «Чи ытарлă хĕр пĕрчи», Чăнкасси ял тăрăхĕнчи Петрова Ульяна «Чи кăмăллă хĕр пĕрчи», Атăлçи ял хутлăхĕнчи Анастасия Сергеева «Чи сăпай хĕр пĕрчи», Шĕнерпуç ял хутлăхĕнчи Александра Белоусова «Чи маттур хĕр пĕрчи», Сĕнтĕрпуç ял хутлăхĕн хĕр пĕрчийĕ Валентина Гаврилова «Чи тараватлă хĕр пĕрчи», Шуршăл ял хутлăхĕнчи София Петрова «Чи çепĕç хĕр пĕрчи» ятсене тивĕçрĕç.

Уяв каçĕн чи хаваслă саманчĕ вара хĕр пĕрчисем тĕрлĕ номинацисенче               ҫӗнтернипе кăна вĕçленмерĕ. Район ыр кằмằллằ çынсемпе пуян, шằпах вěсем хĕр перчисене тĕрлĕ парнесем парса хавхалантарчĕç.

Степанов Юрий Гурьевич ООО «Ярмарка» компанийĕн ертӳçи, Матюшова Е.В Сĕнтĕрвăрри район админитрацийĕн культура тата социаллă аталану пайĕн пуçлăхĕ, Сĕнтĕрвăрри районĕн культура ĕçченĕсем хĕр пĕрчисене парнесем парса хавхалантарчĕç. Çак  конкурса тивĕçлĕ шайра ирттерме пулăшнă  ыр-кằмằллằ, хằйсен нухратне шеллемен çынсене чун-чĕререн тав тăватпăр, ăнăçу сунатпăр.

Уяв каçне Сĕнтĕрпуç культура çурчĕ çумĕнчи пултарулăх ушкăнĕсем куракансене юрăсем парнелерĕç, залра ларакан çынсен чĕрисенче ырă туйăмсем çуратрĕç.